Адептио ХХК

25 жилийн ашиглалтын дараа пассив барилгын битүүмжлэл ямар байгааг тогтоох нь хэмжилтийн ажлын чухал хэсэг байлаа.
Пассив барилга нь гаднаас агаарыг бараг л үл нэвтрүүлэх хэмжээний битүүмжлэлтэй байх хэрэгтэй. Гадна хашлага хийц дэх нягт бус орон зай, завсар, цууралт, залгаас гэх мэт гаднаас агаар нэвтрэх зай завсрыг дээд зэргээр хааж битүүмжлэх хэрэгтэй. Ингэснээр хүйтэн агаарыг урсгалыг багасган халаалтын ачааллыг бууруулж эрчим хүчээ хэмнэх юм.
Зураг дээр анхны пассив барилгыг барих үед 1991 онд битүүмжлэлийг шалгаж хэмжиж байгаа нь. Хэмжилтээр тухайн үед баригдаж байсан шинэ барилгуудтай харьцуулахад гаднаас агаар нэвтрүүлэх үзүүлэлт нь 10 дахин бага байсан бөгөөд энэ нь итгэмээргүй сайн үзүүлэлт байжээ. 

Зураг дээр 25 жилийн дараа барилгын битүүмжлэлийг шалгах BlowerDoor тест хийж байгаа нь.
Хэмжилтийн зорилго нь битүүмжлэлийг сайн байлгахын тулд авсан арга хэмжээнүүд нь хэр урт хугацаанд үр дүнтэй байна вэ гэдгийг тодорхойлоход чиглэжээ. Жишээ нь: дээвэр ба ханын залгаас уулзвар хэсэг, хана ба цонхны залгаас гэх мэт.
BlowerDoor тест нь сэнсний тусламжтайгаар барилгын дотор илүүдэл эсвэл сөрөг агаарын даралт үүсгээд хэдий хэмжээний агаар барилгаас гадагшилсан эсвэл барилга руу нэвтэрснийг хэмжих аргаар барилгын битүүмжлэлийг тогтоодог байна. 

Барилгын бүх цонх, хаалга гэх мэт завсар зай байж болох хэсгээр битүүмжлэлийг шалгаж байгаа нь.
Эхний зураг дээр термоанемометр багажаар салхины хурдыг хэмжиж байна, дараагийн зураг дээр театрын утаа болон дулаан хэмжигч камер ашиглан завсар цав гарсан хэсгүүдийг илрүүлж байна. 

Барилгын агаар нэвтрүүлэлтийн эхний хэмжилтийн дүн тун сайн буюу n50=0,28 ц-1 гарчээ. Энэ n50 үзүүлэлт багасах тусам барилгын битүүмжлэл сайн байна. Орчин үеийн пассив барилгын стандартын дагуу n50<0,6 ц-1 байх шаардлагатай бөгөөд энэ үзүүлэлтээс хоёр дахин бага байгаа нь маш сайн үзүүлэлт юм. Герман улсын хууль тогтоомжийн дагуу орон сууцны барилгын n50 стандарт утга нь 1,5-3,0 ц-1 байдаг ажээ.

Хэдийгээр хэмжилтийн дүн сайн гарсан боловч агаар нэвтрүүлэлт өндөр гарсан зарим хаалга, цонхны нягтруулга жийргэвчийг сольж сайжруулав. Үүний дараа дахин BlowerDoor тест хийж хэмжихэд n50=0.21ц-1 болж барилгын битүүмжлэл илүү сайжирсан байна.

Хэмжилт судалгааны бас нэг чухал ажил нь анхны пассив барилгад дулааны гүүр байгаа эсэхийг шалгах байв. Дулааны гүүр гэдэг нь орчин тойрныхоо хашлага хийцээс илүү дулааныг дамжуулан алдаж байгаа хэсэг газрыг хэлэх бөгөөд энэ нь ихэвчлэн барилгын булан, хана-хучилт, хана-суурийн залгаас уулзвар, тагтны хавтан, цонх хаалганы хананд суух хэсгүүд байдаг. Энэ хэсгүүдийн дотор гадаргуу дээрх температур бага байдаг учраас конденсаци үүсгэнэ, мөн хүйтэн гадаргуу нь тав тухгүй нөхцөлийг бий болгодог. 

Анхны пассив барилгын термограф зураглал дээр температурын тархалт жигд, дулаан алдагдал маш бага байгаа нь харагдаж байна. Тунгалаг бус хашлага хийц-хана цэнхэр өнгөөр, харин тунгалаг элемент-цонх жигд ногоон өнгөөр ялгарч харагдаж байна. Эндээс харахад гадна хашлага хийцэд дулааны гүүр үүсээгүй, хана, цонх нь анх угсарсан үеийн чанараа хадгалсаар байна гэж дүгнэсэн байна. Харин зүүн талд харагдах жижиг улаан толбо нь дулааны гүүр биш агааржуулалтын төхөөрөмжөөс гадагшаа хаяж байгаа агаарын урсгал байна.  

Анхны пассив барилга болон эрчим хүчний хэмнэлттэй барилгыг харьцуулсан зураг. Эндээс пассив барилга нь эрчим хүчний хэмнэлттэй барилгаас маш бага дулаан алдагдалтай болох нь тод харагдаж байна.  

Барилгын дотор цонхны шил болон хүрээний гадаргуу дээрх температур жигд байгаа нь харагдаж байна.  

Барилгын дотор хучилт болон ханын гадаргуу дээрх температур мөн жигд байна. Өрөөний дотор гадаргуугийн температурын зөрүү үл мэдэгдэхүйц бага учраас энэ нь тав тухтай орчныг бүрдүүлнэ. Мөн өрөөний агаарын температур ба гадаргуугийн температур ойролцоо учраас конденсац, хөгц мөөгөнцөр үүсэхгүй байх нөхцөлийг бүрэн хангаж чаджээ.
Анхны пассив барилга дээр 25 жилийн дараа хийсэн судалгаа шинжилгээний ажлаар тус барилга нь анх ашиглалтанд орох үеийнхтэй адил чанартай, бүх конструкц бүтээц хэвийн, төлөвлөсний дагуу ажиллаж байгааг бодит хэмжилт, тестийн үр дүнгээр харуулжээ.